Da Henka frogd: „Sog, hosd du no an letztn Wunsch, du arma Mo?“ Da Kini lacht: „Du liaba Henka, du machsd ma jetz sogar no Gschenka.“ Ja schbini, sogd da Kini.
Kategorie: Ja schbini, sogd da Kini
Schwarz
„I frog mi, Mo, wos du woi daasd, wennsd auf amoi koa Kini waast.“ Der tippt mim Finger kurz aufs Hirn: „Dann dad i einfach schwarz regiern.“ Ja schbini, sogd da Kini.
An Urbi und an Orbi
Da Kini sogd: „Wennsd Papst bist, dann kimmst nimma weg vom Vatikan und wurscht, obsd Franz hoaßd oda Gorbi, du sengsd an Urbi und an Orbi.“ Ja schbini, sogd da Kini.
Hausarrest fias Voik
Da Kini scheißt s Voik amoi zam: Wos s moana dad, wia ma s denn ham, und steckt s zehn Dog in Hausarrest. Sogd s Voik: „S kunnd sei, er waar leicht gstresst.” Ja schbini, sogd da Kini.
Da Kini draamd
Da Kini draamd: A grillda Giggal,
und do dazua vom Bier a Schliggal
und in da Sonna glitzert schee
der Chiem-, vielmehr da Kinisee.
Ja schbini, sogd da Kini.
Kracht hods
Da Kini sogd: „Auf Mitternacht hods draußd vorm Schloß auf oamoi kracht. Dann krachts no mehra und kracht fester, und wiari aufwach, is Neijohr.“ Ja schbini, sogd da Kini.
Scho drei
Da Kini sogd: „Es is scho drei. Dei Geisterstund is längst vorbei.“ „Mein“, sogd da Geist, „verehrter Kunde, ich mach 'ne Geisterüberstunde.“ Ja schbini, sogd da Kini.
Hoamzua
Frogd d'Kuni: „Ja, wo warst du denn?“ „I bin ganz kurz beim Schmied drent gwen. Der soid a neie Rüstung schmiedn, und hoamzua hob i mi varrittn.“ Ja schbini, sogd da Kini.
Geburtstagsstandl
Vorm Kini schdäd da Ritterchor und drogd 's Geburtstagsstandl vor. Da Kini is zutiefst gerührt. An dem Dog hod a mild regiert. Ja schbini, sogd da Kini.
Mei liaba Schneider
Da Kini sogd: „Mein liaba Schneider, wos du so zsammgnaht host, paßt leider ned hinten und erst recht ned vorn.“ „Des is aa fia die Frau gnaht worn.“ Ja schbini, sogd da Kini.
